Simon Jones
Fydd cyn-fowliwr cyflym Morgannwg, Simon Jones ddim yn chwarae yng nghystadleuaeth yr IPL yn India y tymor hwn.
Roedd Jones, sy’n 35 oed, ar y rhestr o chwaraewyr ar gyfer yr ocsiwn a gafodd ei gynnal ddoe a heddiw.
Roedd e ar werth am 3 miliwn rupee, ond doedd yr un tîm wedi gwneud cais amdano.
Dywedodd Jones yr wythnos diwethaf y byddai’n chwilio am gytundeb i barhau i chwarae yn Lloegr pe na bai’n llwyddiannus yn yr ocsiwn.
Mae wedi diodde’n gyson o anafiadau ac wedi penderfynu canolbwyntio ar y gemau byr.
Y Cymro Richard Madley o Gaerdydd oedd yn gyfrifol am gynnal yr ocsiwn.
