Mae Lance Armstrong wedi colli ei hawl i’w saith teitl Tour de France ar ôl iddo benderfynu peidio herio cyhuddiadau o ddefnyddio cyffuriau.
Neithiwr cyhoeddodd Lance Armstrong na fyddai’n ymladd yr honiadau, ac mai “digon yw digon.”
Yn dilyn y cyhoeddiad dywedodd Asiantaeth Gwrth-gyffuriau yr Unol Daleithiau y byddan nhw’n cosbi’r gŵr o Texas.
Mae wedi cael ei wahardd rhag cystadlu eto ac wedi colli’r holl deitlau a enillodd ar ôl 1 Awst 1998, sy’n cynnwys y saith teitl Tour de France a enillodd rhwng 1999 a 2005.
Roedd Armstrong, 40, wedi dod yn arwr i filiynau o bobol ar ôl gorchfygu canser, ennill y ras feics fwyaf yn y byd, a sefydlu elusen ganser, ond mae’n cael ei ystyried yn dwyllwr bellach gan asiantaeth gyffuriau ei wlad.
