Mae’r nofiwr David Roberts yn ystyried cystadlu dros Sweden er mwyn ennill lle yn y Gemau Paralympaidd yn 2016.
Methodd y Cymro, sydd wedi ennill 11 medal aur paralympaidd, â sicrhau lle yn nhim Prydain ar gyfer y Gemau eleni yn dilyn salwch ac anafiadau.
Byddai Roberts yn gymwys i gynrychioli Sweden oherwydd ei fod wedi dyweddïo â merch o’r wlad honno ac yn ystyried dod yn ddinesydd.
Apeliodd Roberts yn erbyn penderfyniad yr awdurdodau Prydeinig i’w adael allan o’r tîm eleni.
Doedd e ddim wedi gallu cystadlu yn rownd gyntaf y treialon oherwydd salwch ac yna methodd â chyflawni’r amser priodol yn y 50m a’r 100m dull rhydd yn Sheffield ym mis Ebrill.
Mae Roberts wedi mynnu na fydd yn ymddeol wedi’r siom.
