Siom Khan wrth i’r ornest yn erbyn Peterson gael ei ganslo

Mae’r bocsiwr Amir Khan wedi son am ei siom ar ol i’w ornest yn erbyn Lamont Peterson gael ei ganslo.

Roedd y pencampwr o America wedi methu prawf cyffuriau.

Datgelwyd yn gynharach yr wythnos hon bod Peterson, oedd wedi curo Khan ym mis Rhagfyr i gipio’r teitl WBA a IBF, wedi cael prawf positif am steroid sydd wedi ei wahardd.

Roedd na amheuaeth a fyddai’r ornest rhwng y ddau ar 19 Mai yn Las Vegas yn cael ei gynnal, ond fe gyhoeddodd Khan heddiw bod yr ornest bellach wedi ei ganslo.

Dywedodd mewn cyfweliad gyda Sky Sports News: “Rydw i’n hynod o siomedig oherwydd roeddwn i wedi ymarfer yn galed iawn ar gyfer yr ornest.

“Roedd yn sioc fawr i mi glywed bod Peterson wedi methu prawf cyffuriau. Mae wedi fy mrifo i yn fawr oherwydd roeddwn i wir eisiau rhoi perfformiad da a dangos i’r byd mor dda ydy Amir Khan.”