Mae Gerwyn Price yn galw am ddod â Phencampwriaeth Byd Dartiau’r PDC i Gymru.
Daw ei sylwadau ar ôl iddo golli yn rownd wyth ola’r gystadleuaeth yn yr Alexandra Palace yn Llundain.
Fe wnaeth e’r sylw ar ei gyfrif Instagram wrth fyfyrio ar y gystadleuaeth eleni, pan oedd e’n ceisio cadw ei afael ar y tlws enillodd e’r llynedd i ddod yn brif ddetholyn y byd.
Fe wynebodd e sawl gêm heriol o du’r dorf yn Llundain, gyda sylwadau gwrth-Gymreig ystrydebol yn cael eu hanelu ato fe drwy gydol y twrnament.
Fe ddaeth y cyfan i fwcwl neithiwr (nos Sadwrn, Ionawr 2) pan fu’n rhaid iddo ymdopi â rhywun yn y dorf yn anelu sylwadau ato’n gyson, cyn iddo droi ac ymateb.
Mae Sky Sports wedi bod yn gostwng y sain ar eu rhaglenni ar adegau wrth i’r dorf ei wawdio, wrth iddyn nhw hefyd dargedu rhai o’r chwaraewyr Albanaidd gyda sylwadau sydd yn cael eu galw’n hiliol ar y cyfryngau cymdeithasol.
“Mae hi ond yn deg os yw Pencampwriaeth y Byd yn cael ei chynnal ym mhob gwlad,” meddai.
“Cymru, yr Alban, Iwerddon, Lloegr, Ewrop.
“Cymru y flwyddyn nesaf, plis.”
