Jamie Donaldson
Mae’r Cymro Jamie Donaldson allan o Bencampwriaeth Chwarae Gornest Volvo yng Nghlwb Llundain.
Collodd Donaldson o 3&2 yn erbyn yr Americanwr Patrick Reed wrth iddyn nhw gystadlu am le yn rownd yr wyth olaf.
Gorffennodd Reed bum twll un ergyd yn well na’r safon ac roedd yr Americanwr bedwar twll ar y blaen gyda phedwar twll yn weddill.
Er i Donaldson ddod o fewn trwch blewyn i ennill y pymthegfed twll a tharo ergyd gychwynnol dda ar y twll nesaf, gorffennodd Reed yr unfed twll ar bymtheg un ergyd yn well na’r safon i selio’r fuddugoliaeth.
Mae’r Ffrancwr Victor Dubuisson eisoes wedi sicrhau ei le yn rownd yr wyth olaf.
Donaldson oedd seren Cwpan Ryder wrth iddo daro’r ergyd fuddugol i Ewrop fis diwethaf.
