Mae rhaglen deledu Dim Ysgol: Maesincla wedi ennill gwobr am y Rhaglen Cyfnod Clo Orau yng ngwobrau Broadcast.
Bwriad Broadcast yw dathlu cynyrchiadau gorau’r maes darlledu yn y Deyrnas Unedig.
Fe gafodd y seremoni ar-lein ei chynnal neithiwr (nos Iau, Mai 27).
Llwyddodd Dim Ysgol: Maesincla i gipio’r wobr gan guro rhaglenni ITV, BBC1, BBC2 a Channel 4.
Daeth Dim Ysgol: Maesincla i’r brig yng nghategori’r ‘Rhaglen Cyfnod Clo Orau: Rhaglenni Newyddion, Dogfen a Ffeithiol’.
Ffilmiwyd y rhaglen yn yr ysgol yng Nghaernarfon yn ystod y cyfnod clo, a bu’n gyfle i ddal fyny efo straeon plant, eu teuluoedd a staff cymuned arbennig Maesincla yn ystod cyfnod o newid mawr yn hanes yr ysgol.
Nid dyma’r tro cyntaf i raglen am yr ysgol gael ei gwobrwyo – enillodd Ysgol Ni: Maesincla wobr yn y categori ‘Cyfres Ffeithiol’ yn BAFTAS Cymru y llynedd.
“Rhaglen onest a chynnes”
“Diolch o galon i Manon Gwynedd [Pennaeth Ysgol Maesincla] ac ysgol a chymuned gyfan Maesincla am ymddiried ynom ni i adlewyrchu lleisiau’r plant a’u teuluoedd mewn cyfnod anodd,” meddai Elen Rhys, Comisiynydd Adloniant S4C.
“Dyma raglen onest a chynnes yn dangos cymuned ar ei gorau â chymeriadau Maesincla yn serennu drwy gydol y ddogfen.
“Llongyfarchiadau i Gwmni Cynhyrchu Darlun a’r tîm i gyd.”
