Rihanna (CCA 2.0)
Stadiwm y Mileniwm fydd lleoliad cyntaf taith y gantores Rihanna ym Mhrydain y flwyddyn nesaf.
Bydd y seren yn dod â’i thaith ‘Diamonds’ i Gaerdydd ar 10 Mehefin, gyda gwestai arbennig David Guetta yn ei chefnogi.
Y dinasoedd Prydeinig eraill iddi ymweld â hwy fydd Manceinion, Llundain, Birmingham a Sunderland.
“Mae Rihanna yn seren fyd-eang ac mae mor gyffrous bod Stadiwm y Mileniwm yn cynnal ei thaith ‘Diamonds’ o gwmpas y byd yr haf nesaf” meddai Rheolwr Stadiwm y Mileniwm, Gerry Toms.
“Dim ond llond llaw o leoliadau ym Mhrydain fydd y daith yn ymweld â nhw a bydd yn bendant o roi hwb i Gymru gael dechrau yn Stadiwm y Mileniwm.”
Tocynnau
Mae tocynnau’r daith yn mynd ar werth am 9:00 bore fory, 20 Tachwedd, gyda phrisiau rhwng £35 a £75 yn dibynnu ar y ddinas.
Mae’r enillydd gwobr Grammy wedi gwerthu dros 37 miliwn o albyms a 146 miliwn o draciau digidol yn fyd eang, ac ar hyn o bryd yn dal y record fel y gantores â’r gwerthiant digidol uchaf erioed.
Mae Rihanna ar frig y siartiau byd-eang ar hyn o bryd gyda ‘Diamonds’, ei sengl gyntaf o’i seithfed albwm stiwdio ’Unapologetic’ – mae’r albwm wedi’i ryddhau heddiw.
