Yn dilyn llwyddiant ei sengl gyntaf, mae Malan Fôn Jones, neu Malan (ei henw artist) yn barod i ryddhau cân newydd, ‘Greed’, ddydd Gwener (Awst 14).
Cantores o Gaernarfon yw Malan sy’n cael ei “dylanwadu gan gerddoriaeth jazz a pop.”
Mae ei sengl gyntaf, ‘Busy Bee’, gafodd ei ryddhau ar Fehefin 19, wedi cael ei ffrydio 9,000 o weithiau a’i gynnwys ar restr chwarae New Music Friday, sy’n cyflwyno detholiad o ganeuon Prydeinig newydd pob dydd Gwener.
“Roedd y playlist yn help mawr ac mae o wedi rhoi hyder imi wrth symud ymlaen oherwydd doeddwn i ddim yn gwybod sut ymateb fyddai’r gân yn ei gael,” meddai Malan wrth golwg360.
“Dw i’n gobeithio bydd y gân newydd yn gwneud cystal, er dw i ddim yn gwybod sut eith pethau chwaith.”
Agored i ganu yn Saesneg a Chymraeg
Er mai yn y Saesneg mae Malan yn canu yn ei dwy sengl gyntaf, dywed ei bod hi’n agored i ganu yn y Gymraeg hefyd.
“Dw i bendant yn bwriadu gwneud cerddoriaeth Cymraeg hefyd, jest fod y ddwy gyntaf ’ma’n digwydd bod yn Saesneg.
“Mae fy ngherddoriaeth i wedi newid o’r math o beth roeddwn i’n gwneud o’r blaen, dw i’n gwneud mwy o’r math o sŵn dw i’n mwynhau wan.”
Cydweithio gyda’i chariad
Bu Malan ar waith celf y sengl ‘Greed’ gyda’i phartner, Dion Wyn Jones, sy’n brif leisydd ac yn chwarae gitâr i’r band Alffa.
Mae ef hefyd yn gwybod peth neu ddau am ffrydio, a cafodd y gân ‘Gwenwyn’ gan Alffa ei ffrydio dros ddwy filiwn o weithiau.
“Mae Dion wedi dechrau dylunio pethau iddo fo’i hun ac felly mi ddaru ni drio cwpwl o bethau allan a dw i’n gallu dweud wrtho fo be’ dw i’n licio,” meddai Malan.
“Roedd o yn y stiwdio pryd fues i’n recordio ‘Greed’ oedd yn neis.”
