Cyn ganwr Texas Radio Band yn rhyddhau record

Mae EP cyntaf cyn ganwr Texas Radio Band yn cael ei ryddhau heddiw.

Losin Pwdr yw enw prosiect cerddorol newydd Matthew ‘Mini’ Williams a recordiodd yr EP mewn stiwdio a adeiladodd ei hun yng Ngwlad y Basg, ble mae’n byw.

Meddai label cerddoriaeth Peski mewn datganiad bod y record, ‘Câr Dy Henaint’, yn adlewyrchiad cerddorol o feddylfryd Mini wrth iddo droi’n 30 mlwydd oed.

Mae’r record hefyd yn cynnwys fersiwn o ‘Xalbadorren Heriotzean’ gan Xabier Lete, cân Basgaidd am hen fardd a bugail o’r enw Xalbador.

Meddai’r datganiad gan Peski fod y gerddoriaeth yn cynnwys “elfennau o synau lleisiol, acwstig ac electronig.”