Bydd Côr Cymry Gogledd America yn mynd ar daith o amgylch Cymru, ac yn perfformio mewn lleoliadau ar hyd a lled y wlad er mwyn dathlu pen-blwydd y côr yn 25 mlwydd oed.
Mae dros hanner y côr yn dysgu Cymraeg ers mis Medi 2020, ac mae’r cantorion yn cynnwys disgynyddion i fewnfudwyr o Gymru.
Bydd y côr sydd â hanner cant o aelodau, sy’n cynnwys cantorion o dros 17 talaith yn yr Unol Daleithiau a thair talaith yng Nghanada, yn ymweld â Chymru rhwng Gorffennaf 1 ac 8, a hon fydd eu taith fwyaf o amgylch Cymru ers 2002.
Cafodd y côr ei sefydlu yn 1998 gan Dr Mari Morgan, sy’n hanu o Lanelli, ac mae hi wedi arwain llu o gymanfaoedd canu ar draws yr Unol Daleithiau a Chanada, yn yr Ariannin, ac yn Seland Newydd.
Dysgu am ddiwylliant a barddoniaeth Cymru
Cyn y pandemig, roedd y côr yn cyfarfod yn flynyddol, ond newidiodd popeth oherwydd Covid, fel yr eglura Dr Mari Morgan.
‘‘Roedd 2020 yn flwyddyn wahanol iawn i’r arfer i ni fel côr!” meddai.
“Cyn hynny ro’n ni’n dod at ein gilydd unwaith y flwyddyn, ac unwaith y tymor ar lefel ranbarthol.
“Ond pan ddaeth Covid-19, ro’n i’n cyfarfod bron bob wythnos i ganu a chryfhau’r gymdeithas o fewn y côr.’’
Erbyn hyn, maen nhw’n cyfarfod bob wythnos ar-lein, ac yn dysgu am ddiwylliant a barddoniaeth Cymru, yn ogystal â dysgu Cymraeg llafar, gan gynnwys ynganu a phatrymau iaith sylfaenol, wedi eu seilio ar y cwrslyfrau sydd wedi eu datblygu gan y Ganolfan Dysgu Cymraeg Genedlaethol.
‘Rhoi ystyr i ganeuon ac emynau’
Mae Lisa Hopkins yn byw yn Pennsylvania, ond mae ei theulu’n hanu o Gymru.
Wedi bod yn dysgu Cymraeg ers dwy flynedd, mae hi bellach yn diwtor Dysgu Cymraeg.
‘‘Ro’n i eisiau dysgu Cymraeg er mwyn deall mwy am fy nhreftadaeth,” meddai.
“Hefyd, mae gallu darllen Cymraeg yn rhoi mwy o ystyr i ganeuon ac emynau Cymraeg.
“Dw i wedi bod yn dysgu cwrs lefel Mynediad i ddechreuwyr ers dwy flynedd.
“Mae’n braf gweld cariad y criw tuag at y Gymraeg.
“Mae gweld hyder y dysgwyr yn datblygu wrth siarad Cymraeg yn rhoi boddhad mawr i mi.’’
‘Dipyn o brofiad’
Bydd y daith yn dechrau yn Eglwys Santes Mair yng Nghonwy nos Sadwrn (Gorffennaf 1), cyn mynd ymlaen i Aberystwyth (Gorffennaf 4), Aberteifi (Gorffennaf 5) a’r Fenni (Gorffennaf 8).
Un sy’n edrych ymlaen at y daith, ac at ymweld â gogledd Cymru yn arbennig yw Allison LaPointe.
Mae hi’n dod o St Paul ym Minnesota, ac yn dysgu Cymraeg ers tair blynedd.
‘‘Dw i’n gyffrous iawn bod y daith yn dechrau yng ngogledd Cymru, achos mae fy nheulu yn hanu oddi yno,” meddai.
“Mi wnaeth fy hen daid symud i Utica, Efrog Newydd o’i gartref yn Nyffryn Ardudwy, gogledd Cymru.
“Dyma fy nhaith gyntaf i Gymru, felly mi fydd yn dipyn o brofiad.’’
