Dychwelodd gŵyl gerdd “eiconig” Iwerddon, Lleisiau Eraill, i Aberteifi eleni.
Cafodd Lleisiau Eraill, gŵyl gerdd a rhaglenni teledu cerddoriaeth fyw Iwerddon, ei chynnal yn fyw am y tro cyntaf ers 2019 fis Tachwedd.
Fel rhan o’r arlwy, bu tri diwrnod a thair noson o gerddoriaeth gan artistiaid o Gymru, Iwerddon a thu hwnt.
Cychwynnodd Lleisiau Eraill fel digwyddiad cerddorol untro mewn eglwys fechan yn Dingle yng ngorllewin Iwerddon ugain mlynedd yn ôl.
Ers hynny, mae’r ŵyl wedi tyfu ac wedi teithio i lefydd fel Llundain, Belffast, Efrog Newydd, Berlin, a Texas.
Cafodd yr ŵyl ei chynnal yn Aberteifi yn 2019 hefyd, ac eleni cafodd Llwybr Cerdd ei gynnal mewn nifer o leoliadau o gwmpas y dref, gyda thros 80 o ddigwyddiadau.
Ynghyd â pherfformiadau cerddorol y Llwybr Cerdd, cafodd sesiynau Clebran eu cynnal, sef sgyrsiau gydag artistiaid, newyddiadurwyr, ac unigolion creadigol a gwleidyddol.
Huw Stephens oedd yn llywyddu’r ŵyl, a chafodd y prif berfformiadau eu cynnal yn Eglwys y Santes Fair, eu dangos yn fyw yn y Mwldan a’u ffrydio’n fyd-eang drwy YouTube Lleisiau Eraill.
Dyma rai o hoff luniau golwg360 o’r penwythnos gan y ffotograffydd Stuart Ladd…
