“Mae hi’n adeg gyffrous i fod yn gwrando ar gerddoriaeth Gymraeg”, yn ôl sylfaenydd gwefan gerddoriaeth annibynnol Klust.
Daw hyn ar ôl i Owain Elidir Williams dderbyn £2,500 o grant NextGenFund gan Youth Music er mwyn ehangu’r gwasanaeth.
Fe lansiodd y wefan ym mis Rhagfyr y llynedd, gan ariannu’r fenter o’i boced ei hun.
Dywedodd bryd hynny ei fod yn bwriadu “cefnogi artistiaid sy’n torri drwodd” a “rhoi sbin gwahanol ar bethau”.
Nawr, mae’n dweud bod ganddo uchelgais i dyfu’r fenter a bod grant NextGenFund yn allweddol er mwyn cyflawni ei uchelgais.
Pleser cyhoeddi fod Klust wedi'i dewis ar gyfer y Gronfa #NextGenFund eleni — Diolch @youthmusic am y gefnogaeth arbennig ?
Stay tuned for some exciting news over the coming weeks → https://t.co/hwyvzkvxhE pic.twitter.com/1cOloqJrhV
— Klust. (@klustmusic) September 2, 2022
‘Uchelgais’
“Mae o’n mynd i sefydlogi’r holl beth a fy ngalluogi i gario ymlaen i ddatblygu’r wefan a dod â syniadau gwahanol i mewn,” meddai Owain Elidir Williams wrth golwg360.
“Mae o hefyd yn mynd i fy ngalluogi i’w wneud o’n fwy cynaliadwy.
“Yn hytrach na fy mod i’n hollol ddibynnol arna’ i fi fy hun, mae’n braf gwybod bod yna bot bach o bres yna i fi i gyflawni fy syniadau.
“Mae o’n braf cael cydnabyddiaeth hefyd a gwybod bod yna bobol y tu ôl i chdi, bod yna bobol yn gweld y potensial.
“Ac mae cael cefnogaeth gan rywun fel Youth Music, wel, dim ond pethau da all ddod o hynna.
“Mae popeth yn ddigidol ar hyn o bryd, felly’r uchelgais ydi bod Klust yn dal i dyfu i fod yn llwyfan byw hefyd, dw i am iddo fo fod yn frand.
“Dw i hefyd yn awyddus i drefnu gigs, o bosib mewn llefydd dydy bandiau Cymraeg heb gael y cyfle i fynd draw iddyn nhw.
“Felly’r bwriad ydi cario ymlaen i dyfu, a gobeithio un dydd y byddai’n gwneud hyn fel swydd.
“Dw i wastad yn ysgrifennu’n slei bach, yn trio rhoi darnau at ei gilydd.
“Dw i ddim yn dweud fod hyn yn syniad newydd, mae gen ti gymaint o wefannau cerddoriaeth allan yna.
“Ond does yna ddim llawer yn rhoi sylw penodol i artistiaid o Gymru o bosib.
“Mae hi’n adeg gyffrous i fod yn gwrando ar gerddoriaeth Gymraeg felly mae bod yn rhan fach o hynna yn y cefndir yn rhywle yn gyffrous.”
