Gyda’r tywydd wedi oeri’n sylweddol, a gwynt a glaw dyddiol, mae hi’n bryd meddwl am frecwast cynnes i godi calon. Be’ well ar fore tywyll, felly, na’r heulwen ffres yma ar blât? Cychwyn iach, syml a bendigedig i’r dydd.
Bydd angen:
- Torth (o’ch dewis) – rwy’n hoffi torth gaws neu surdoes!
- Sbigoglys
- Wyau
- Caws Gruyere
- Garlleg
- Nionyn coch
- Hadau sesame
- Olew tsili
Paratoi
Torrwch nionyn coch yn fân, ynghyd â darnau o garlleg.
Ffriwch hadau sesame yn sych.
Coginio
Rhowch wok neu badell ffrio dros wres canolig i uchel.
Ychwanegwch y tsili, ac unwaith y bydd yn boeth ychwanegwch y sbigoglys.
Trowch y cymysgedd am funud neu ddwy nes ei fod wedi gwywo.
Torrwch dafelli o fara ffres a’u tostio.
Rhowch joch dda o olew ar y bara a rhwbio darnau garlleg arno.
Torrwch wyau a’u gollwng i badell. Coginiwch yr wyau nes bod y gwyn yn setio a’r melynwy yn rhedeg (neu nes eu bod wedi coginio at eich dant).
Gosodwch y sbigoglys a’r hadau sesame ar y bara.
Llithrwch yr wyau ar blât a gratio caws am eu pennau. Gadewch i’r caws doddi am funud neu ddwy.
Rhowch nionyn coch ar ben yr wy.
Gweinwch gyda thost (neu reis am bryd hwyrach yn y dydd)… neu beth bynnag sy’n cymryd eich ffansi.
Mwynhewch!
