Mae’r cogydd Chris Roberts dweud ei fod yn edrych ymlaen at hybu cig Cymru yn Qatar yr wythnos nesaf.
Bydd Hybu Cig Cymru’n cymryd rhan mewn digwyddiad masnach yno, a bydd Chris Roberts yn ymweld efo nhw er mwyn arddangos Cig Oen Cymru.
Yn ôl y cogydd o Gaernarfon, fydd yn gwneud barbeciw ym mhreswylfa Llysgennad Prydain yn Qatar, mae’n gyfle i hyrwyddo hunaniaeth bwyd Cymru y tu allan i’r wlad.
Bydd arddangosfa o gynnyrch yno, bydd prynwyr lleol yn medru cwrdd â chynrychiolwyr o’r sector amaeth a bwyd yng Nghymru, a chig oen Cymru fydd canolbwynt pryd o fwyd arbennig gan Chris Roberts.
Mae’r digwyddiad yn Qatar yr wythnos nesaf yn rhan o raglen i hyrwyddo Hybu Cig Cymru yn y Dwyrain Canol, ac mae cyfran fawr o’r gwaith yn cael ei wneud ar y cyd â Llywodraeth Cymru.
“Dw i erioed wedi bod yn Qatar o’r blaen, a dw i’n gutted fy mod i’n mynd i Qatar fis cyn mae’r World Cup yn cychwyn a fy mod i ddim yna’r un pryd!” meddai Chris Roberts wrth golwg360.
“Ond fe wnes i wneud rhywbeth tebyg yn Dubai ym mis Mawrth drwy Lywodraeth Cymru a Hybu Cig Cymru, fe wnes i goginio barbeciw yn fan honno ac mae hwn yn rywbeth tebyg.
“Dw i’n defnyddio cig oen Cymreig, ŵyn mynydd, ac yn gwneud pob dim ar y barbeciw.
“Dw i newydd fod yn gwneud pop-ups yn Efrog Newydd a ffilmio hwnna, fydd yna gyfres newydd ar S4C ym mis Rhagfyr.
“Yn Efrog Newydd, doedd o ddim am goginio cynnyrch Cymru. Pan dw i’n mynd ffwrdd i goginio, dw i’n licio coginio efo’r cynnyrch lleol – dydy o ddim bob tro am ddefnyddio cig oen Cymreig ym mhob man rownd y byd!
“Yr un peth yn Qatar, dim bod yna lwyth o gynnyrch lleol yn tyfu yno, ond fydda i’n defnyddio gymaint o gynnyrch lleol â dw i’n gallu pan fydda i yno hefyd.”
Cig, tân a mwg
Mae Chris Roberts yn edrych ymlaen at gael coginio yn rhywle gwahanol eto, a chynnig rhywbeth gwahanol i’r “fine dining” sy’n arferol mewn digwyddiadau o’r fath.
“Cig, tân a mwg – dyna ydy ethos fi efo’r tân, dod â phobol at ei gilydd,” meddai.
“Gawn ni weld sut eith hi. Mae gen i ddau kilo o gig oen wedi cael ei yrru yno, iogwrt Cymreig, llwyth o gig oen o Stad Rhug [yng Nghorwen].
“Fydd hi’n weird bod yn Qatar yn coginio efo’r un pethau dw i’n eu coginio yn fan yma.
“Mae yna lobsters o Gymru’n cael eu gyrru yna’n fyw hefyd!”
Hyrwyddo yn y Dwyrain Canol yn ‘flaenoriaeth’
Mae cig oen Cymru’n cael ei werthu yn yr Emiradau Arabaidd Unedig ers tua 15 mlynedd, ond dim ond ers pum mlynedd mae gan Gymru hawl i allforio i wledydd eraill yn y rhanbarth, fel Qatar a Kuwait.
Yn ôl Hybu Cig Cymru, mae datblygu marchnad y Dwyrain Canol yn flaenoriaeth, fel rhanbarth lle mae pobol yn bwyta llawer o gig oen, yn gorfod mewnforio llawer o’u cig, a lle mae twristiaeth yn bwysig.
Hyd yn hyn yn 2022, mae’r allforion o Gymru i Qatar wedi cynyddu 350% o gymharu â’r un cyfnod yn 2021.
Mae nawr yn “gyfle euraidd i gymryd mantais ar bresenoldeb tîm pêl-droed Cymru yng Nghwpan y Byd i hybu brandiau nodedig Cymreig” hefyd, meddai Pennaeth y Gadwyn Gyflenwi yn Hybu Cig Cymru.
“Mae’r Dwyrain Canol yn farchnad o flaenoriaeth uchel i Gig Oen Cymru, ochr yn ochr â chynnal ein marchnadoedd gwerthfawr ym Mhrydain ac Ewrop, a datblygu masnach gydag Asia a Gogledd America,” eglura Jon Parker.
“Mae cig oen yn fwyd poblogaidd yno, ac oherwydd yr hinsawdd mae’n rhaid i wledydd y Dwyrain Canol fewnforio dipyn o’u bwyd ffres.
“Mae’r sector arlwyo a lletygarwch yn cynnig marchnad bwysig ar gyfer cig o safon uchel, sy’n meddu ar stori gref o ran cynaliadwyedd.
“Bu cyfnod Covid yn her wrth i ni geisio datblygu marchnadoedd newydd fel Qatar, ond nawr mae economi’r rhanbarth yn ffynnu eto.
“Mae Cig Oen Cymru eisoes wedi bod ar gael mewn nifer o siopau a gan gyflenwyr i’r sector lletygarwch yn Qatar.”
‘Pwysig â’r Bunt yn isel’
Mae’r farchnad dramor yn arbennig o bwysig â’r Bunt yn isel a chwyddiant ar gynnydd, meddai Jon Parker.
“Ein nod yw datblygu’r fasnach yma a sefydlu’r brand Cymreig yn Qatar ac ar hyd y rhanbarth.
“Mae Hybu Cig Cymru yn gweithio gydag asiantaeth arbenigol yn y Dwyrain Canol, a gyda Llywodraeth Cymru, ar gyfres o ddigwyddiadau a mentrau hyrwyddo, a fydd o gymorth i gynyddu gwerthiant.
“Bydd hi’n bwysig i yn y dyfodol i ddatblygu ystod eang o farchnadoedd, er mwyn sicrhau fod ffermwyr a phroseswyr ddim yn or-ddibynnol ar un cwsmer.
“Mae rhwng 30 a 40% o Gig Oen Cymru a Chig Eidion Cymru yn cael ei allforio dramor mewn masnach sydd werth £200m y flwyddyn.
“Ar gyfnod lle mae cyfraddau cyfnewid y Bunt yn isel, a chwyddiant yn cael effaith ar gwsmeriaid ym Mhrydain, mae ein marchnadoedd allforio yn fwy pwysig nag erioed.”
‘Hyrwyddo cyn Cwpan y Byd’
Dywedodd llefarydd ar ran Llywodraeth Cymru bod y digwyddiad yn cael ei gynnal i hyrwyddo bwyd a diod o Gymru i brynwyr allweddol yn Qatar cyn Cwpan y Byd.
“Bydd yn cael ei gynnal gan y Llysgennad ac yn cynnwys dirprwyaeth o fusnesau bwyd a diod Gymreig fydd yn gallu cyflwyno eu cynnyrch.”
