Cyflwr anarferol ar y galon oedd yn gyfrifol am farwolaeth bachgen 13 oed o Reading mewn afon yng nghanolbarth Cymru ddwy flynedd yn ôl.
Roedd Stewart McEwan, a oedd yn chwaraewr pêl-droed addawol, wedi cwympo i mewn i afon Wysg ger Aberhonddu wrth ganŵio.
Roedd ef a merch yn yr un canŵ ag ef wedi syrthio i’r dŵr ac fe ddaeth yn amlwg ar unwaith ei fod mewn trafferthion.
Dyfarniad naratif
Mewn cwest yn Aberhonddu, fe gofnododd y Crwner ddyfarniad naratif ar y bachgen – gan gofnodi’r hyn ddigwyddodd heb roi bai.
Roedd hi’n ymddangos, meddai, bod y bachgen wedi marw o gyflwr ar y galon nad oedd wedi ei nodi cyn hynny.
Roedd ei fam wedi rhoi caniatâd iddo fynd i nofio ond gan nodi ei fod wedi llewygu ddwywaith o’r blaen mewn pwll.
Tirabad
Roedd y criw o Ysgol Maiden Erlegh yn Reading yn aros yng nghanolfan awyr iach Tirabad ger Llanwrtyd ac yn cymryd rhan mewn trip rygbi a hoci.
“Fe adewais i ef wrth gatiau’r ysgol ar fore dydd Gwener i fynd ar drip ysgol i Gymru a ddaeth e ddim yn ôl,” meddai mam y bachgen, Janet McEwan.
Llun: Stewart McEwan (Heddlu Dyfed-Powys)
