Mae’r Samariaid wedi dweud bod angen eu gwasanaethau yn fwy nag erioed wrth i ansicrwydd ariannol daro Cymru.
Ddoe datgelodd yr elusen strategaeth newydd pum mlynedd er mwyn lleihau faint o bobol sy’n cyflawni hunanladdiad yng Nghymru bob blwyddyn.
Mae tua 300 o bobol yn lladd eu hunain yng Nghymru yn flynyddol, a dynion ifanc yw’r gyfran fwyaf o’r rheini.
Dywedodd prif weithredwr y Samariaid, Catherine Johnstone, y byddai eu gwasanaeth nhw ar gael 24 awr y diwrnod o hyn ymlaen er mwyn darparu cefnogaeth i’r rheini sydd ei angen.
Roedd y toriadau mewn gwariant cyhoeddus yn golygu bod rhaid iddyn nhw newid eu strategaeth ar gyfer y blynyddoedd nesaf, meddai.
“Pan ydym ni wedi cael dirwasgiad yn y gorffennol mae o fel arfer wedi taro’r sector breifat,” meddai.
“Y tro yma rydym ni’n canolbwyntio yn bennaf ar y sector gyhoeddus a chwmnïau sy’n darparu gwasanaethau.
“Mae gyda ni rôl i’w chwarae wrth gefnogi pobol sydd erioed wedi wynebu colli eu gwaith o’r blaen.”
Dywedodd y Samariaid yng Nghymru y bydden nhw’n canolbwyntio yn bennaf ar y rheini sy’n ystyried cyflawni hunanladdiad, pobol sy’n cefnogi eraill mewn argyfwng, pobol sy’n anafu eu hunain a phobol sydd wedi eu heffeithio gan hunanladdiad rhywun arall.
