Mae tad merch gollodd ei lle ar gyfres yr X Factor dros y penwythnos wedi beirniadu’r rhaglen gan ddweud mai “ffics” yw’r cyfan.
Penderfynodd y beirniaid gadw’r gantores ddadleuol Katie Waissel ar y rhaglen, er iddi anghofio geiriau ei chân, ac er iddyn nhw gyfaddef mai Treyc Cohen oedd y gantores orau.
Mae Fitzgerald Cohen, 68 oed, wedi galw am ymchwiliad gan gwestiynu pam i un o’r beirniaid, Cheryl Cole, wrthod pleidleisio.
Mae’n debyg bod awdurdod Ofcom wedi derbyn mwy nag 1,000 o gwynion ar ôl i Cheryl Cole wrthod dewis rhwng Treyc Cohen neu Katie Waissel.
Yn ôl papur newydd The Sun roedd Katie wedi cael llai o lawer o bleidleisiau na Treyc.
“Mae o’n ffics. Mae o mor syml â hynny,” meddai Fitzgerald Cohen wrth y papur newydd.
“Does gen i ddim syniad pam bod Treyc allan o’r rhaglen. Hi oedd y gantores orau o bell ffordd a ddylai hi ddim bod wedi colli yn erbyn Katie.
“Mae yna lot yn mynd ymlaen tu ôl i’r llenni fel bod rhai o’r cystadleuwyr yn cael eu cadw i mewn.
“Dyw’r rhaglen ddim byd i’w wneud gyda chanu. Roedd Cheryl yn gwybod mai Treyc oedd y gantores orau ond fe wnaeth hi eistedd yn ôl a gadael iddi fynd.”
