Fe gafodd dyn ei arestio ac mae’r heddlu’n chwilio am un arall ar ôl i gar daro 14 o bobol y tu allan i glwb nos yn Rochdale.
Maen nhw’n credu bod y ddau wedi cael eu hatal rhag mynd i mewn i glwb nos o’r enw Dali a’u bod wedi dod yn ôl i ymosod ar y bownsars.
Yn ôl Heddlu Manceinion, roedden nhw wedi dwyn car Saab ac yna’i yrru at y clwb yn oriau mân bore Sul.
Roedd y car wedi taro criw o bobol oedd ar y palmant. Mae tri o’r rheiny’n dal i fod yn yr ysbyty, er nad yw eu bywydau mewn peryg.
Mae dyn 26 oed yn cael ei holi ar amheuaeth o geisio llofruddio ac fe apeliodd yr heddlu am gymorth i ddod o hyd i’r dyn arall.
Llun: Rochdale (Kram 4 – CCA 3.0)
