Cafodd dau ddyn 19 oed eu lladd wrth i’r car yr oedden nhw’n teithio ynddo droi drosodd yng nghyffiniau Pen-y-bont ar Ogwr tua 4 o’r gloch y bore yma.
Roedd pump o ddynion lleol yn teithio yn y car Vauxhall Corsa gwyn ar yr A4061 tua’r gogledd at bentref Melin Ifan Ddu pan ddigwyddodd y ddamwain. Doedd dim cerbyd arall yn gysylltiedig â’r gwrthdrawiad.
Mae’r heddlu’n apelio am dystion, a hefyd am wybodaeth gan unrhyw un a allai fod wedi gweld y cerbyd, neu’r dynion a oedd ynddo, yng nghanol tref Pen-y-bont neithiwr.
Gofynnir i unrhyw un â gwybodaeth ffonio Heddlu De Cymru ar 101.
