Cafodd 14 o bobl eu hanafu ar ôl i gar gael ei yrru i ganol criw o bobl y tu allan i glwb nos yn ystod oriau mân y bore.
Mae’r heddlu’n chwilio am y gyrrwr a’i deithiwr a oedd wedi esgyn yn fwriadol ar y pafin yn Rochdale, ar gyrion Manceinion, mewn Saab a oedd wedi cael ei ddwyn.
Aed â saith dyn a saith merch am driniaeth i’r ysbyty, ond ni chredir bod bywyd yr un ohonyn nhw mewn perygl.
Fe ddigwyddodd yr ymosodiad am 2.10 y bore yma y tu allan i’r Dali Bar ar Packer Street yn y dref, a chred yr heddlu i’r ddau ddyn yn y car gael eu gwrthod rhag mynd i mewn i’r bar yn gynharach.
Cafwyd hyd i’r car mewn stryd gyfagos tua dwyawr yn ddiweddarach.
Llun: Heddlu fforensig yn ymchwilio i’r digwyddiad y tu allan i’r clwb nos yn Rochdale (Gareth Copley/gwifren PA)
