Fe fydd yr actor o ogledd Cymru, Rhys Ifans yn actio rhan gelyn Spider Man yn y ffilm nesaf am y llyfrau comic.
Mae Sony Pictures, y cynhyrchwyr, wedi cadarnhau mai Ifans fydd dihiryn y ffilm sydd i fod i ymddangos ym mis Gorffennaf 2012.
Dyw Sony Pictures ddim yn fodlon cadarnhau beth fydd enw cymeriad y Cymro ond fe fydd yn actio wrth ochr Andrew Garfield sydd wedi cael ei ddewis i olynu Tobey Maguire yn rhan Spider Man.
Yn ôl papur y Telegraph, fe gafodd Rhys Ifans ei ddewis yn ddihiryn ar ôl i reolwyr y ffilm weld ei berfformiad yn y ffilm hanesyddol Anonymous, a fydd yn cael ei chyhoeddi’r flwyddyn nesaf.
‘Gallu anghredadwy’
“Mae gallu anghredadwy Rhys i ymgorffori cynhesrwydd a llid yn ei wneud yn ddewis delfrydol ar gyfer y cymeriad yma,” meddai cyfarwyddwr y ffilm, Marc Webb.
Fe fydd y rhan yn hwb enfawr i yrfa’r Cymro sydd eisoes yn llewyrchu. Fe fydd Rhys Ifans yn cael ei weld yn ffilm ddiweddaraf Harry Potter y mis nesaf.
Er hynny, cymysg yw’r adolygiadau hyd yn hyn i’r ffilm sydd yn y sinemâu ar hyn o bryd – Mr Nice lle mae’r actor o Ruthun yn portreadu Howard Marks, y smyglwr cyffuriau o ardal Pen-y-bont.
Llun: Rhys Ifans
