Mae gwaith ymchwil newydd yn awsgrymu mai’r Cymoedd yn y De ac ardal Wrecsam yn y Gogledd sy’n debygol o gael eu taro galetaf gan y toriadau gwario yn y sector cyhoeddus.
Mae’r gwaith ymchwil, a gomisiynwyd gan y BBC, yn dangos fod y Gogledd a’r Gorllewin yn debygol o fod yn fwy gwydn yn wyneb y toriadau ariannol na’r De.
Blaenau Gwent yw’r mwyaf bregus
Yn ôl yr ymchwil, Sir Fynwy, Powys a Cheredigion fydd yn teimlo lleiaf o effaith o ganlyniad i’r toriadau, tra y bydd Blaenau Gwent, Merthyr Tudful, a Chaerffili yn dioddef fwyaf.
Yn y Gorllewin, bydd Gwynedd a Sir Benfro yn dod allan ohoni’n well na Sir Gaerfyrddin ac Ynys Môn, meddai’r ymchwil.
Mae’r ddwy ardal fydd yn dioddef waethaf a lleiaf, Sir Fynwy a Blaenau Gwent, y drws nesaf i’w gilydd.
Dangos gallu i ymdopi
Dywedodd y Gorfforaeth mai’r nod oedd dangos pa ardaloedd o Gymru a fyddai’n gallu ymdopi orau gyda chwymp mewn swyddi.
Roedd ymchwilwyr wedi ystyried faint o fusnesau lleol oedd ym mhob ardal, lefelau sgiliau’r boblogaeth, disgwyliad oes y trigolion, lefelau troseddau a phrisiau tai.
Fe fydd canlyniad Adolygiad Gwario Cynhwysfawr y Llywodraeth yn cael ei gyhoeddi ar 20 Hydref. Fe fydd yn datgelu faint y bydd cyllidebau bob adran, yn ogystal â chyllidebau’r llywodraethau datganoledig, yn cael eu torri.
Y rhestr llawn – pwy fydd yn diodde’?
1 – Blaenau Gwent
2 – Merthyr Tudful
3 – Caerffili
4 – Castell-nedd Port Talbot
5 – Torfaen
6 – Rhondda Cynon Taf
7 – Abertawe
8 – Wrecsam
9 – Casnewydd
10 – Pen y Bont ar Ogwr
11 – Sir Ddinbych
12 – Sir Gar
13 – Ynys Môn
14 – Conwy
15 – Caerdydd
16 – Gwynedd
17 – Sir y Fflint
18 – Sir Benfro
19 – Bro Morgannwg
20 – Ceredigion
21 – Powys
22 – Sir Fynwy
