Llwyddodd Airbus UK Broughton i grafu gêm gyfartal o ddwy gôl yr un yn erbyn y Seintiau Newydd yng Nghroesoswallt nos Wener – diolch i benderfyniad dadleuol gan y dyn ar y lein.
Roedd y dyfarnwr wedi galw am y gêm i barhau yn dilyn tacl Craig Jones ar Carl Owen yn y cwrt cosbi ar ôl 88 munud o chwarae.
Ond newidiodd ei feddwl ar ôl i’r llumanwr ddweud ei bod yn drosedd a chafodd yr ymwelwyr gic o’r smotyn.
Fe lwyddodd y capten Mark Allen i sgorio.
Y gêm
Y Seintiau oedd wedi chwarae orau drwy gydol y gêm gyda Matthew Williams yn dechrau’r sgorio iddyn nhw ar ôl 40 munud o chwarae.
Fe lwyddodd Steve Evans i ddod ag Airbus yn gyfartal dair munud yn ddiweddarach.
Sgoriodd Richie Patridge yr ail i’r Seintiau bedair munud i mewn i’r ail hanner, a wnaeth Airbus ddim bygwth llawer ar ôl hynny.
Mae’r canlyniad yn golygu bod Airbus yn parhau i rannu’r ail safle gyda’r Seintiau yn yr Uwch Gynghrair.
Llun: Logo Airbus UK Broughton
