Mae Heddlu Gogledd Cymru’n apelio am dystion ar ôl i fachgen 17 oed farw o ganlyniad i wrthdrawiad car yn Llandudno.
Fe fu farw Ryan Llewelyn Owen, a oedd o Landudno, o’i anafiadau yn Ysbyty Glan Clwyd neithiwr.
Roedd y car Peugeot lliw arian yr oedd yn ei yrru wedi gwrthdaro ag arwyddbost ar Ffordd Conwy, Llandudno, ychydig wedi 11 nos Iau.
Fel rhan o ymchwiliad yr heddlu, cafodd gyrwyr tri cherbyd arall a oedd yn cael eu hamau o deithio mewn confoi gyda’r Peugeot eu herestio a’u holi.
Mae’r heddlu’n gofyn i unrhyw un sydd â gwybodaeth am y digwyddiad eu ffonio ar 101 neu 08456071001.
