Mae yna beryg na fydd Tiger Woods yn chwarae yn y Cwpan Ryder yng Nghasnewydd yn yr hydref – am nad yw’n ddigon da.
Fe fyddai hynny’n ergyd fawr i’r trefnwyr gan mai’r chwaraewr o’r Unol Daleithiau yw’r enwoca’ yn y byd.
Fe ddywedodd ei hun fod posibilrwydd na fydd yn cael ei ddewis i chwarae i’r Unol Daleithiau oherwydd safon ei chwarae ar hyn o bryd.
Fe gafodd ei ganlyniad gwaetha’ erioed mewn cystadleuaeth fawr ym Mhencampwriaeth Golff Proffesiynol y Byd ddoe ar ôl rownd ola’ o 77.
Ar ôl gorffen, fe ddywedodd ei hun fod safon ei chwarae’n wael – mae wedi diodde’ ers iddo geisio dod yn ôl ar ôl ei helyntion personol.
“Fyddai rhywun sy’n sgorio 18 ergyd tros y safon ddim yn help i unrhyw dîm,” meddai.
(Llun AP Photo)
