Mae Abertawe wedi arwyddo cyn gapten tîm dan 21 Ffrainc, Yassin Moutaouakil ar dreial wrth i’r rheolwr, Brendan Rogers geisio cryfhau’r garfan cyn dechrau’r tymor newydd.
Mae’r amddiffynnwr wedi ymuno gyda’r Elyrch ar ôl i’w gytundeb gyda Charlton ddod i ben.
Fe ymunodd y cefnwr gyda Charlton ym mis Mehefin 2007 am tua £400,000 oddi wrth Chatearoux, er gwaethaf sïon bod ‘na ddiddordeb gan glybiau megis Everton, Aston Villa, Celtic a Lazio.
Ond fe fethodd â setlo yn The Valley ac fe ymunodd gyda Motherwell ar ddechrau tymor diwethaf.
Dychwelodd i Charlton ym mis Ionawr eleni ac fe benderfynodd y clwb a’r chwaraewr i ddod â’i gytundeb i ben.
Mae disgwyl i Yassin Moutaouakil chwarae i’r Elyrch yn erbyn Hwlffordd heno yn eu gêm gyfeillgar olaf cyn i’r tymor newydd ddechrau dros y penwythnos.
