Mae BP wedi cytuno i werthu rhywfaint o’i asedau i gwmni arall er mwyn codi arian i dalu am y gwaith o glirio’r llygredd olew yng Ngwlff Mecsico.
Bydd y cwmni Prydeinig yn gwerthu asedau yn yr Aifft a Gogledd America, gan gynnwys tir yn nhalaith Texas a Canada, i Apache Corp am $7 biliwn (£4.5 biliwn).
Mae BP eisoes wedi dweud eu bod nhw’n gobeithio gwerthu tua $10 biliwn o asedau yn ystod y 12 mis nesaf i dalu am y trychineb amgylcheddol.
Cameron ‘yn deall’
Ddoe dywedodd y Prif Weinidog, David Cameron ei fod yn deall pam fod yr Unol Daleithiau yn anhapus gyda BP a galwodd ar y cwmni i dalu “iawndal priodol”.
Ond ychwanegodd bod “miloedd o swyddi bob ochr i’r Iwerydd yn dibynnu ar y cwmni” a’i fod o “er budd y ddwy wlad ei fod yn gwmni cryf a sefydlog yn y dyfodol”.
Mae’r olew yng Ngwlff Mecsico wedi bod yn gollwng ers i lwyfan Deepwater Horizon ffrwydro, gan ladd 11 o weithwyr, ar 20 Ebrill. Yr wythnos hon, am y tro cyntaf, fe lwyddodd BP i atal yr olew rhag gollwng.
Dywedodd BP y byddai cwmni Apache o Houston, Texas, yn talu blaendal o $5 biliwn ar 30 Mehefin.
‘Buwch mewn cae’
Fe fydd yr asedau yn Texas yn costio $3.1 biliwn, yr asedau yng Nghanada yn costio $3.25 biliwn, a’r asedau yn yr Aifft yn costio $650 miliwn.
Yn ôl prif weithredwr Apache, Steven Farris, roedd hwn yn “gyfle prin” i brynu asedau gan “gwmni olew mawr”.
Ychwanegodd bod eu strategaeth yn debyg i “ddilyn buwch drwy gae ŷd a magu bol ar y briwsion sydd ar ôl”.
