Fe fydd y drefn o roi grantiau mawr i fusnesau i agor ffatrïoedd neu brynu offer yn cael ei dileu.
Yn lle hynny, fe fydd y pwyslais ar wella’r isadeiledd – pethau fel gwasanaethau band llydan – ar fenthyciadau a chydweithio rhwng prifysgolion a busnes.
Mae disgwyl cyhoeddiad gan y Dirprwy Brif Weinidog, Ieuan Wyn Jones, heddiw ar ôl cyfnod o ymgynghori gyda busnesau trwy Gymru.
Ieuan Wyn Jones sy’n gyfrifol am yr economi a thrafnidiaeth yn y Llywodraeth ac roedd eisoes wedi awgrymu y byddai newid sylfaenol.
Rhai meysydd
Ar hyn o bryd, mae gan Gymru system gymharol hael o grantiau diwydiannol ac yn y gorffennol fe ddaeth yn enwog am ddenu busnesau mawr tramor.
Erbyn hyn, mae’r llif hwnnw wedi arafu – er y bydd y cyhoeddiad yn cael ei wneud yn ffatri Panasonic ger Caerdydd.
Yn y dyfodol, mae’n bosib mai dim ond mewn rhai meysydd penodol y bydd grantiau ar gael – ble mae’r Llywodraeth yn credu bod gobaith am dwf.
Llun: Ieuan Wyn Jones – cyhoeddiad heddiw
