Mae Fede Bessone wedi penderfynu gadael Abertawe i ymuno gyda Leeds Utd – un o wrthwynebwyr yr Elyrch yn y Bencampwriaeth y tymor nesa’.
Roedd cytundeb yr amddiffynwr wedi dod i ben ac, er i Abertawe gynnig cytundeb newydd iddo, fe benderfynodd yr Archentwr adael Stadiwm Liberty am ogledd Lloegr.
Ergyd i Sousa
Fe ddaw’r newyddion o’i ymadawiad yn ergyd arall i reolwr Abertawe, Paulo Sousa, sydd eisoes wedi colli Leon Britton i Sheffield Utd ar ôl i’w gytundeb yntau ddod i ben gyda’r Elyrch.
Fe fydd Fede Bessone yn ymuno gyda chlwb Elland Road yn swyddogol ar Orffennaf 1.
Fe ymunodd gydag Abertawe ym mis Mehefin 2008, ond fe gyfyngodd anafiadau yr amddiffynnwr i 34 ymddangosiad dros y clwb.
“Mae’n gyfforddus ar y bêl, mae’n amddiffyn yn dda ac mae wedi chwarae’n dda yn y Bencampwriaeth,” meddai rheolwr Leeds Utd, Simon Grayson.
