Mae ffrwydriad mewn dormatori ffatri yn China wedi lladd saith o weithwyr ac anafu un arall.
Fe gafodd yr adeilad pedwar llawr ei ddinistrio, ac mae swyddogion yn rhoi’r bai ar ffrwydron anghyfreithlon. Mae’r dormatori yn rhan o ffatri sy’n cynhyrchu slabiau cerrig ym mhentre’ Niugang yng ngogledd y wlad.
Fe gafodd cyrff chwech o weithwyr eu darganfod yng ngweddillion yr adeilad, tra bod un arall wedi marw ar ôl cael ei gludo i’r ysbyty.
Ffrwydron
Mae ffrwydron anghyfreithlon yn cael eu cynhyrchu yn ardal Hebei gerllaw, ac maen nhw’n cael eu gwerthu i ffermwyr sy’n gobeithio gwneud arian ychwanegol trwy gloddio am gerrig eu hunain.
Mae’r awdurdodau wedi ceisio lleihau’r nifer o bobol sy’n cael gafael ar ffrwydron fel hyn, yn enwedig ar ôl i wr oedd yn trio dial ar ei gyn-wraig ac eraill ddefnyddio ffrwydron anghyfreithlon i ddinistrio adeiladau yn Shijiazhuang, prifddinas Hebei, yn 2001. Fe laddodd 108 o bobol.
