Mae rheolwr Caerdydd, Dave Jones wedi targedu’r chwaraewyr newydd y mae eisiau eu hychwanegu at ei garfan y tymor nesaf.
Mae yna adroddiadau bod gan Dave Jones diddordeb mewn dau o chwaraewyr Stoke, sef y chwaraewr canol cae, Michael Tonge a’r amddiffynnwr Andy Griffin.
Fe allai Tonge lanw’r bwlch pe bai Joe Ledley yn penderfynu gadael yr Adar Glas pan fydd ei gytundeb yn dod i ben mis nesaf.
Matthews yn mynd?
Mae Jones yn awyddus i ychwanegu cefnwr de i’r garfan, ac mae hefyd yn ystyried gwneud cynnig am amddiffynnwr QPR, Mikele Leigertwood.
Pe bai Jones yn llwyddo i ychwanegu cefnwr de arall i’r garfan, fe allai ganiatáu i Adam Matthews adael y clwb. Mae Man Utd ac Arsenal yn barod i dalu tua £4m am yr amddiffynnwr ifanc.
Blaenoriaeth arall i Dave Jones dros yr haf yw arwyddo ymosodwr ychwanegol ac, er y sïon bod Craig Bellamy eisiau dychwelyd i’w ddinas enedigol, mae’r rheolwr am geisio arwyddo Steve Howard o Gaerlŷr.
Mae angen ymosodwr ar Gaerdydd sy’n dda yn yr awyr ac sy’n gallu cysylltu’r chwarae’n effeithiol.
Mae Jones yn credu y byddai Howard yn gallu gwneud hynny, ar ôl iddo greu trafferthion mawr i amddiffyn yr Adar Glas yn ail gymal rownd gyn derfynol gemau ail gyfle’r tymor diwethaf.
