Mae pedwar o bobol yn dal i fod yn ddifrifol wael ar ôl y ddamwain bws ysgol a laddodd ddau o ddisgyblion ac un oedolyn yn Cumbria.
Yn ôl llygad-dystion fe ddigwyddodd y ddamwain wrth i’r bws geisio osgoi car oedd wedi dod allan o’i flaen. Fe drawodd yn erbyn car arall – Honda Civic – a throi ar ei ochr.
Bachgen a merch o Ysgol Keswick yw’r ddau ddisgybl sydd wedi eu lladd – roedd y bws ar ei ffordd o’r ysgol i ardal Cockermouth lle cafwyd y llifogydd mawr y llynedd.
Fe fu’n rhaid i hofrenyddion gario’r bobol sydd wedi eu hanafu’n ddrwg i adrannau brys yn ysbytai Middlesborough, Newcastle a Preston.
Yn ôl swyddog heddlu, roedd hi’n amlwg ar unwaith bod y ddamwain yn un ddifrifol, gyda phobol wedi eu hanafu’n ddrwg ac eraill yn diodde’ o trawma.
Roedd yna 35 o bobol wedi cael anafiadau llai yn y ddamwain a ddigwyddodd brynhawn ddoe.
Llun: Craen yn ceisio codi’r bws wedi’r ddamwain (Gwifren PA)
