Mae chwech o filwyr Nato a 12 o bobol gyffredin wedi cael eu lladd mewn ffrwydrad yn Afghanistan.
Digwyddodd yr ymosodiad yn ymyl confoi o gerbydau milwrol yn y brifddinas, Kabul, heddiw. Credir fod hunanfomiwr wedi ffrwydro car.
Roedd pump o’r milwyr Nato a fu farw yn Americanwyr, ac mae adroddiadau fod gwragedd a phlant ymysg y rhai eraill a gafodd eu lladd.
Mae’r Taliban wedi hawlio cyfrifoldeb.
Dyma’r ymosodiad mawr mwyaf yn Kabul ers mis Chwefror, pan gafodd 16 o bobol eu lladd yn dilyn ffrwydradau mewn dau westy yng nghanol y ddinas.
Roedd heddlu Afghanistan wedi addo gwell diogelwch yn dilyn yr ymosodiadau yna.
