Mae heddwas o dde Cymru wedi cael ei garcharu am 12 mis ar ôl rhannu cannoedd o ddelweddau anweddus o blant dros y we.
Fe ddefnyddiodd Ditectif Cwnstabl Michael Thomas, 40 oed, o Bort Talbot, feddalwedd rhannu lluniau i anfon a derbyn delweddau o blant yn cael eu cam-drin yn rhywiol.
Fe dderbyniodd Michael Thomas 2,500 o ddelweddau, gan anfon 253 dros saith mis yn 2007.
Clywodd Llys y Goron Caerdydd bod 456 o’r delweddau a dderbyniodd a 33 o’r rhai anfonodd yn anweddus.
11 cyhuddiad
Fe’i cafwyd yn euog gan y rheithgor yn gynharach yn y mis ar 11 cyhuddiad o ddosbarthu delweddau anweddus, deg o greu delweddau anweddus, ac un o feddu ar ddelweddau anweddus o blant.
Cafodd Michael Thomas ei ddal ar ôl i ymchwiliad gan y FBI.
Difrifol
Clywodd y llys bod pump o’r lluniau oedd ym meddiant Michael Thomas yn lluniau lefel pump – dyma’r lluniau mwyaf difrifol.
Roedd y ditectif wedi anfon lluniau anweddus at heddwas cudd, gan feddwl ei fod yn bedoffeil.
Pan chwiliodd yr heddlu ei gartref fe gafodd ei ganfod bod 30,000 o ffeiliau wedi cael eu dileu oddi ar gyfrifiadur Michael Thomas oriau ynghynt.
Dedfrydu
Wrth ddedfrydu Michael Thomas, fe ddywedodd y Barnwr David Morris bod y ditectif wedi cyfrannu at fasnach pornograffi plant.
“Oni bai am bobol sydd eisiau derbyn y delweddau yma, ni fyddai yna farchnad i gam-drin plant ar gyfer creu’r math yma o ddelweddau,” meddai’r Barnwr.
