Mae bachgen 11 oed wedi marw a merch tair oed mewn cyflwr difrifol ar ôl i gar fod mewn damwain ar ffordd sy’n arwain at yr A55.
Fe ddigwyddodd y gwrthdrawiad toc ar ôl 9:30 y bore yma i gyfeiriad y gorllewin ger Llaneurgain. Dim ond un cerbyd oedd yn rhan o’r digwyddiad.
Fe gafodd pedwar o bobol eu dal y tu mewn i Vauxhall Corsa coch ar y gilffordd ger bwyty McDonalds a gwesty’r Holiday Inn.
Fe gafodd tri o griwiau tân eu galw yno ac fe fu’n rhaid defnyddio offer hydrolig i dorri’r bobol yn rhydd.
Yn ogystal â’r ferch fach, mae dau oedolyn yn derbyn triniaeth yn yr ysbyty.
Mae Heddlu Gogledd Cymru’n apelio ar unrhyw dystion i gysylltu â nhw ar 101, neu 08456071001.
