Mae rheolwr Abertawe yn cael ei dargedu i gymryd yr awenau gyda’i gyn glwb ym Mhortiwgal, Sporting Lisbon.
Fe chwaraeodd Sousa i Sporting o dan reolaeth y diweddar Bobby Robson.
Roedd y gŵr o Bortiwgal wedi cael ei gysylltu gyda’r swydd ‘nôl ym mis Tachwedd, ond Carlos Carvalhal a olynodd Paulo Bento bryd hynny.
Ond mae ‘na sïon ar led y gallai Sousa ddychwelyd i’wwlad genedigol i gymryd lle Carvalhal.
Mae Paulo Sousa eisoes wedi dweud ei fod yn awyddus i reoli ar y lefel uchaf, ac yn ddiweddar mae wedi dangos ei rwystredigaeth gyda’r diffyg arian sydd ganddo i gryfhau carfan Abertawe.
Mae’r Elyrch wedi cael tymor llwyddiannus yn y Bencampwriaeth o dan reolaeth Sousa gydag Abertawe yn agos at ennill eu lle yn y gemau ail gyfle.
Pe bai Paulo Sousa yn gadael fe fyddai’r clwb yn wynebu gorfod dod o hyd i reolwr newydd am yr ail dro mewn blwyddyn.
