Fe fydd dyn yn ymddangos o flaen Llys Ynadon Caernarfon heddiw wedi ei gyhuddo o lofruddio Leon Jones yng Nghaergybi.
Mae Scott Whitley, 29, hefyd yn dod o Gaergybi ac mae wedi ei gyhuddo hefyd o herwgipio, o ymosod ac o fod ym meddiant arf gyda llafn.
Roedd heddlu wedi cael eu galw i ardal Tan yr Efail yng Nghaergybi toc wedi hanner nos fore Sul ar ôl adroddiadau bod dyn wedi ei anafu’n ddrwg.
Aethpwyd â Leon Jones, 21, i Ysbyty Gwynedd, Bangor, ond fe fu farw yno. Roedd wedi cael ei drywanu.
Mae dyn arall, a gafodd ei arestio ddydd Sul, wedi cael ei ryddhau ar fechnïaeth.
