Mae Llywodraeth Ffrainc wedi cyflwyno cyfraith sy’n gwahardd y defnydd o ffonau symudol mewn ysgolion.
Y nod yw helpu plant i ganolbwyntio ar eu gwersi, i gymdeithasu’n well ac i leihau’r defnydd o’r cyfryngau cymdeithasol.
Mae’r llywodraeth hefyd yn gobeithio y bydd yn atal lladrata, trais a bwlio o fewn yr ysgol.
‘Dim ffonau symudol’
Mae’r gyfraith yn gwahardd y defnydd o ffonau symudol ymhlith disgyblion mewn ysgolion cynradd ac uwchradd.
Mae’n golygu na fydd hawl ganddyn nhw ddefnyddio’r teclynnau o fewn oriau’r ysgol, gan gynnwys amser cinio, heblaw am adegau pan fo argyfwng. Mae gan blant anabl yr hawl i’w defnyddio hefyd.
Bydd disgyblion yn cael eu gorchymyn i ddiffodd eu ffonau symudol a’u cloi mewn loceri.
I’r rheiny sy’n cael eu dal yn defnyddio un, bydd hawl gan athrawon i gymryd y ffôn a’i gadw tan ddiwedd y dydd.
Mae hawl gan ysgolion uwchradd i gyflwyno’r mesurau yn wirfoddol.
