Mae Boko Haram wedi cyhoeddi fideo sy’n honni bod merched ysgol a gafodd eu cipio ganddyn nhw yn Nigeria wedi cael eu lladd mewn cyrchoedd awyr gan fyddin y wlad.
Mae’r fideo yn dangos un o’r merched yn pledio ar yr awdurdodau i ryddhau gwrthryfelwyr fel bod modd rhyddhau’r merched hefyd.
Roedd y ferch ymhlith 276 o ferched a gafodd eu cipio o ysgol yng ngogledd-ddwyrain y wlad yn 2014.
Mae hi’n honni bod nifer o ferched yn ei dosbarth wedi cael eu lladd yn ystod cyrchoedd awyr, a bod 40 wedi “priodi” eithafwyr Islamaidd.
Cafodd y fideo ei chyhoeddi ar y we gan y newyddiadurwr Ahmad Salkida.
Mae’r fideo’n honni bod y merched Chibok yn cael eu cadw gan arweinydd Boko Haram, Abubakar Shekau.
Mae 218 o ferched ar goll o hyd.
