Mae Cyngor Dinas Lower Hutt yn Seland Newydd yn cefnogi newid enw maesdref Petone i Pito-one.
Mae’r newid yn golygu y bydd enw Māori traddodiadol yr ardal yn cael ei ddefnyddio yn hytrach nag enw gafodd ei greu yn ystod y cyfnod pan oedd yr ardal dan reolaeth ymerodraethol.
Bydd yn rhaid i Fwrdd Daearyddol Seland Newydd gymeradwyo’r newid.
Yn ôl y Cyngor, maen nhw’n ceisio llunio proses fwy strategol er mwyn newid enwau yn y ddinas sy’n wallus neu’n gamarweiniol, a hynny yn y gobaith ychwanegol o helpu pobol i ynganu’r enwau’n well.
Ystyr Pito-one yw “pen traeth tywodlyd”.
Ar ddiwedd awr o drafodaeth, dim ond un cynghorydd oedd yn gwrthwynebu newid yr enw.
Bydd cyfnod ymgynghori hefyd yn cael ei gynnal er mwyn ceisio barn y cyhoedd cyn i’r Bwrdd Daearyddol drafod y sefyllfa.
Mae swyddogion yn annog y Cyngor i gymeradwyo’r newid.
