Mae un o weinidogion Israel, sydd â chyfrifoldeb am y Lan Orllewinol yn y llywodraeth, wedi wfftio pobol, hanes a diwylliant Palesteina.
Mae sylwadau Bezalel Smotrich, y Gweinidog Cyllid, wedi cael eu beirniadu ychydig wythnosau ar ôl iddo achosi helynt arall pan alwodd am “ddileu” tref Balesteinaidd.
Daeth ei sylwadau diweddaraf yn ystod ymweliad â Ffrainc, wrth iddo sefyll ar lwyfan o flaen baner Israel oedd wedi cael ei haddasu i gynnwys tiriogaethau’r Lan Orllewinol, Dwyrain Jerwsalem, Gaza a’r Iorddonen.
Mae Israel yn gwadu mai nhw oedd yn gyfrifol am osod y faner ar y llwyfan, ac mai “gwesteion” yn unig oedden nhw yn y digwyddiad.
“A oes yna hanes neu ddiwylliant Palesteinaidd? Does dim,” meddai Bezalel Smotrich o’r llwyfan.
“Does yna’r fath beth â phobol Balesteinaidd.”
Mae Mohammad Shtayyeh, Prif Weinidog Palesteina, wedi beirniadu’r sylwadau, gan gyhuddo Smotrich o annog trais.
Mewn datganiad arall gan weinyddiaeth dramor Palesteina, dywedodd llefarydd fod Israel yn “mabwysiadu amgylchfyd sy’n gyrru eithafiaeth Israelaidd a brawychiaeth yn erbyn ein pobol” wrth iddyn nhw wadu bodolaeth Palesteina a hawliau ei thrigolion.
Fe wnaeth Smotrich ei sylwadau fis ar ôl i ddau Iddew gael eu lladd gan saethwr Palesteinaidd yn nhref Huwara yn y Lan Orllewinol.
Yr ymateb oedd rhoi tai a cheir ar dân, gan ladd un person Palesteinaidd.
Dydy Smotrich ddim wedi ymddiheuro, gan fynnu iddo “siarad ar gam”.
