Mae cyn-Swyddog Heddlu Minneapolis Derek Chauvin wedi cael ei ddedfrydu i 22 mlynedd a hanner yn y carchar am lofruddiaeth George Floyd.
Arweiniodd llofruddiaeth Mr Floyd o dan ben-glin Chauvin at y protestiadau mwyaf yn erbyn anghyfiawnder hiliol yn yr UD a thu hwnt.
Daeth y gosb ar ôl i Chauvin gynnig cydymdeimlo â theulu Mr Floyd a mynegi gobaith bod ganddynt “rywfaint o dawelwch meddwl” yn y pen draw.
Dyma un o’r dedfrydau carchar hwyaf a orfodwyd erioed ar swyddog heddlu Americanaidd wrth ladd person du.
Siomedig
Ond roedd aelodau o’r teulu Floyd ac eraill yn siomedig ar ôl i’r ddedfryd fod yn llai na’r 30 mlynedd yr oedd erlynwyr wedi gofyn amdani.
Gydag ymddygiad da, gallai Chauvin, 45, fynd allan ar parôl ar ôl treulio dwy ran o dair o’i ddedfryd – tua 15 mlynedd.
Aeth y Barnwr Peter Cahill y tu hwnt i’r ddedfryd 12 mlynedd a hanner a ragnodir o dan ganllawiau’r wladwriaeth, gan ddyfynnu “cam-drin swydd o ymddiriedaeth ac awdurdod a hefyd y creulondeb penodol” a ddangoswyd i Mr Floyd.
Uchafswm
Dywedodd cyfreithiwr teulu Floyd, Ben Crump, fod perthnasau’r dioddefwr wedi derbyn “rhyw fesur o atebolrwydd”, ond maent yn gobeithio y bydd Chauvin yn cael yr uchafswm yn ei dreial hawliau sifil ffederal sydd ar y gweill.
Dywedodd Mr Crump mai dyma’r ddedfryd hwyaf y mae swyddog heddlu erioed wedi’i chael ym Minnesota.
Ond ychwanegodd: “Cyfiawnder go iawn yn America fydd dynion Du a menywod Du a phobl o liw na fydd yn rhaid iddyn nhw ofni cael eu lladd gan yr heddlu dim ond oherwydd lliw eu croen. Byddai hynny’n gyfiawnder go iawn.”
