Hannah Witheridge
Mae dau ddyn o wlad Burma wedi cael eu cyhuddo o lofruddio dyn a dynes o Brydain yng Ngwlad Thai.
Cafwyd hyd i gyrff David Miller, 24, a Hannah Witheridge, 23, ar draeth ar ynys Koh Tao ym mis Medi.
Cafodd Zaw Lin a Win Zaw Htun eu henwi gan yr heddlu ym mis Hydref fel dau yr oedden nhw’n amau o fod wedi lladd y Prydeinwyr.
Yn ôl adroddiadau, roedden nhw wedi cyfaddef eu bod nhw wedi lladd y ddau, ond fe dynnon nhw’r cyfaddefiad yn ôl yn ddiweddarach.
Mae Zaw Lin, 21, yn wynebu pum cyhuddiad – dau gyhuddiad o lofruddio, un cyhuddiad o dreisio Hannah Witheridge, mynd i Wlad Thai yn anghyfreithlon ac aros yn y wlad yn anghyfreithlon.
Mae Win Zaw Htun yn wynebu’r un cyhuddiadau, yn ogystal â chyhuddiad ychwanegol o ddwyn ffôn symudol a sbectol haul David Miller.
