Llosgi dynes i farwolaeth am fod yn ‘wrach’

Mae’r heddlu ym Mhapua New Guinea wedi cyhuddo dau berson o lofruddiaeth, wedi i ddynes gael ei llosgi i farwolaeth o flaen cannoedd o bobol.

Cafodd y fam ifanc Kepari Leniata, 20, ei harteithio gan dorf ar yr ynys, cyn i betrol gael ei dywallt drosti a’i gynnau gyda matsien.

Mae Janet Ware ac Andrew Watea wedi eu cyhuddo o lofruddiaeth.

Roedd Kepari Leniata wedi ei chyhuddo o ddewiniaeth gan deulu bachgen 6 oed a fu farw mewn ysbyty yn ddiweddar.  Mae’r heddlu yn deall mai Ware a Watea oedd mam ac ewythr y bachgen bach.

Dywedodd yr heddlu bod cannoedd wedi gweld y dorf yn ymosod ar Leniata, gan gynnwys plant a phlismyn, ond eu bod wedi methu a rhwystro’r dorf.  Mae disgwyl i fwy o bobol gael eu harestio ac mae’r heddlu yn ymchwilio i ymddygiad y plismyn oedd yn bresennol.

Mae poblogaeth wledig Papua New Guinea yn aml yn beio dewiniaeth am ddigwyddiadau di-esboniad, ond mae’r llofruddiaeth wedi denu beirniadaeth gref gan weddill y wlad.

Mae’r gosb eithaf yn dal i fod mewn grym ar yr ynys, ond nid oes carcharor wedi ei ddienyddio ers 1975.