Bargen Brexit Boris Johnson yw’r bygythiad mwyaf i wasanaethau iechyd yr Alban, yn ôl Nicola Sturgeon, prif weinidog yr Alban, wrth iddi baratoi i draddodi araith yn Fife.
Mae disgwyl iddi ddweud bod prif weinidog Prydain yn “berygl real a chyfredol” i wasanaethau iechyd, ac y bydd ei fargen Brexit yn ei gwneud yn fwy anodd o lawer i ddenu staff o wledydd Ewrop.
Bydd hi’n rhybuddio hefyd y gallai ei fargen dorri incwm yr Alban o £9bn erbyn diwedd y degawd nesaf.
“Brexit eithafol Boris Johnson yw’r prif fygythiad i Wasanaeth Iechyd yr Alban ers iddo gael ei sefydlu ychydig dros 70 mlynedd yn ôl,” mae disgwyl iddi ei ddweud.
“Mae e’n fygythiad real a chyfredol i’n gwasanaeth iechyd annwyl sy’n cael ei reoli’n gyhoeddus.
“Bydd ei gynllun Brexit Torïaidd yn ei gwneud hi’n fwy anodd denu staff y Gwasanaeth Iechyd o Ewrop.
“Bydd yr economi’n arafu, gan roi mwy o bwysau ar gyllidebau’r Gwasanaeth Iechyd.
“O’i gymharu ag aelodaeth o’r Undeb Ewropeaidd, gallai ei fargen dorri incwm cenedlaethol yr Alban o £9bn erbyn diwedd y degawd nesaf.
“Ac os yw Boris Johnson yn tynnu’r Alban a’r Deyrnas Unedig alln o’r Undeb Ewropeaidd heb fargen fasnach o gwbl y flwyddyn nesaf, sy’n edrych yn gynyddol debygol, yna fe allai gostio £12.7bn.”
‘Ymosodiad parhaus’
Bydd Nicola Sturgeon yn rhybuddio bod cwmnïau cyffuriau o’r Unol Daleithiau eisiau “mynediad marchnad llawn” i’r Gwasanaeth Iechyd fel rhan o unrhyw fargen rhwng y Ceidwadwyr a Donald Trump, arlywydd yr Unol Daleithiau.
Byddai hynny’n codi costau’r Gwasanaeth Iechyd, mae disgwyl iddi rybuddio.
“Fydd y Gwasanaeth Iechyd fyth yn ddiogel yn nwylo Boris Johnson,” mae disgwyl iddi ei ddweud.
