“Dim refferendwm annibyniaeth i’r Alban cyn 2021,” meddai San Steffan

Fydd dim ail refferendwm annibyniaeth yn yr Alban cyn 2021, yn ôl David Mundell.

Fe fu Ysgrifennydd yr Alban dan bwysau yn sgil Brexit i ymrwymo i refferendwm yn dilyn yr ymgais aflwyddiannus yn 2014.

Ond mae’n dweud y byddai cyflwyno arian newydd i’r Alban, neu “arian siocled Nicola Sturgeon”, yn “drychinebus”.

Roedd yn ymateb i Tommy Sheppard, Aelod Seneddol Dwyrain Caeredin, wrth iddo alw am roi’r hawl i bobol yr Alban benderfynu eu tynged eu hunain ar drothwy etholiadau Ewrop.

“Pe bai fy mhlaid yn ennill yr etholiad, ysgrifennydd gwladol, a fyddech chi wedyn yn rhoi’r gorau i atal Llywodraeth yr Alban rhag gallu ymgynghori â phobol am eu dyfodol eu hunain?” gofynnodd aelod seneddol yr SNP.

Wrth ateb, dywedodd David Mundell mai diben etholiad Ewrop yw “ethol aelodau seneddol o’r Alban i Senedd Ewrop am y cyfnod byrraf posib”.

Ond mae Deidre Brock, aelod seneddol yr SNP yng Ngogledd Caeredin a Leith, yn dweud bod Llywodraeth Prydain yn “ofni’r twf mewn cefnogaeth” i annibyniaeth yn yr Alban.

Ac mae Pete Wishart, un arall o aelodau seneddol y blaid yn Perth a Gogledd Sir Perth, yn dweud bod yr Alban wedi’i thynnu allan o’r Undeb Ewropeaidd “yn erbyn ei hewyllys.