Angela Eagle, Llun: Lauren Hurley/PA Wire
Mae Angela Eagle wedi cyhoeddi prynhawn ma na fydd yn sefyll fel ymgeisydd i herio Jeremy Corbyn am arweinyddiaeth y Blaid Lafur.
Mae hynny’n golygu mai Owen Smith, AS Pontypridd yw’r unig ymgeisydd i herio’r arweinydd ac yn ôl y BBC mae Angela Eagle wedi dweud y bydd yn ei gefnogi.
Dywedodd ei bod yn tynnu ei henw yn ôl “er budd y Blaid Lafur” er mwyn caniatáu i Owen Smith herio Corbyn. Ychwanegodd bod Smith wedi sicrhau’r nifer fwyaf o enwebiadau gan ASau Llafur.
Roedd Owen Smith wedi derbyn 88 o enwebiadau gan ASau Llafur a dau gan Aelodau Seneddol Ewropeaidd y blaid – roedd angen sicrhau 51 o enwebiadau er mwyn bod yn ymgeisydd.
Roedd awgrymiadau y bore ma bod Jeremy Corbyn yn debygol o wynebu un ymgeisydd yn unig i’w herio am arweinyddiaeth y blaid ar ôl i’r ddau gystadleuydd gynnal trafodaethau ynglŷn â’r ffordd orau i’w ddisodli.
Roedd y ddau gyn-aelod o gabinet yr wrthblaid, Angela Eagle ac Owen Smith, wedi dod i “ddealltwriaeth” ynglŷn â’r ffordd orau i orfodi Jeremy Corbyn i ildio’r awenau.
Serch hynny mae arolwg o aelodau’r blaid yn awgrymu y byddai Jeremy Corbyn yn debygol o sicrhau buddugoliaeth oherwydd y gefnogaeth sylweddol sydd ganddo ar lawr gwlad, a hynny er gwaethaf ymddiswyddiadau nifer o aelodau cabinet yr wrthblaid a phleidlais o ddiffyg hyder yn ei erbyn.
