Nofel Zoella yn gwerthu’n gynt nag unrhyw lyfr cyntaf erioed

Zoe Sugg
Mae nofel blogwraig YouTube wedi gwerthu’n gynt nag unrhyw lyfr cyntaf gan awdur erioed.

Fe werthodd Girl Online, gan y seren flogio Zoella, dros 78,000 o gopïau yn yr wythnos gyntaf.

Mae hynny’n nifer fwy na nofel gyntaf unrhyw awdur ers i gofnodion ddechrau gael eu cadw yn 1998, gan gynnwys awduron fel JK Rowling a Dan Brown.

Blog YouTube

Yn wreiddiol o Wiltshire, fe ddaeth Zoe Sugg yn enwog ar ôl i’w sianel YouTube o dan yr enw Zoella, a ddechreuodd yn 2009, fynd yn boblogaidd iawn ar y we.

Roedd Zoella yn rhoi cyngor ar ffasiwn a harddwch yn y fideos, ac mae ganddi bellach dros chwe miliwn o danysgrifwyr i’w sianel.

Mae gan y flogwraig 24 oed hefyd dros 2.5miliwn o ddilynwyr ar Twitter, ac fe gafodd ei gwahodd i ganu ar y sengl Band Aid diweddaraf gan Bob Geldof.

Mae’r nofel Girl Online yn adrodd stori blogiwr yn ei harddegau a’i pherthynas â chanwr o America, ac mae Zoella eisoes wedi arwyddo cytundeb i gyhoeddi ail lyfr y flwyddyn nesaf.