Georgia Williams
Fe fydd yr heddlu’n parhau i holi dyn 22 oed heddiw ar amheuaeth o lofruddio Georgia Williams o Sir Amwythig.
Ac maen nhw hefyd yn dal i chwilio am gorff y ferch 17 oed sydd heb gael ei gweld ers iddi adael ei chartref nos Sul.
Maen nhw’n chwilio coetir a gwarchodfa natur tua 17 milltir o gartref y ferch yn Wellington ac mae mwy na 50 o blismyn yn rhan o’r ymchwiliad.
Mae’r heddlu’n holi am wybodaeth am fan wen y dyn – mae tystiolaeth ei bod wedi teithio o Wellington i Groesoswallt, Y Rhyl, Caer a Kendal cyn mynd i Glasgow nos Fawrth.
Fe gafodd y dyn ei arestio mewn gwesty yno – yn ôl yr heddlu, roedd yn “ffrind” i Georgia.
Mae gan yr heddlu tan 6.30 bore fory i holi’r dyn.
